今朝起身，已經感受到冬天嚟到嘅感覺
出門即刻著多件衫，踏出門外，望望天空
手機播放住Beyond首灰色軌跡
一路行，腦海一路諗起過去數個月各義士手足抗爭畫面同被捕畫面
鼻頭一酸，忍唔住傷感起嚟
因為我相信拘留室應該好凍，搵多件暖嘅衫著下都無
要求要杯熱水可能都會比人玩
亦好大機會好多人聖誕新年都無得保釋外出
唔知道佢地呢一刻諗緊咩呢
我只係想你地知道，我仍然記掛住你地
被捕人士差唔多六千人，六千人係一個咩概念?
如果一間中學有五百人，咁就有十二間中學所有學生係被捕
呢個係一件好恐怖嘅事
當呢班手足背負住重罪喺手，生活於恐懼之中時侯
但過去日子，成日都聽到有人"扮黃" 或利用 “黃色政見” 去謀利同呃錢
呢班人喺我眼中簡直就係人渣中嘅人渣
想像唔到有人為咗錢為咗利益，連呢啲有血有汗嘅錢都呃
真係唔怕有報應咩?
五年前旺角黑夜當中
當日中午學生比班黑社會圍毆
夜晚趕去時，發覺無警察在場
而我身後有一班手持黃絲帶嘅口罩黑社會
一路大叫：「我黃絲嘅！支持學生！」一路狂毆身邊嘅途人學生
呢個畫面同恐懼令我畢生難忘
所以我對於利用政見去謀取利益嘅人
我係十分鄙視同憎恨
亦黑心講句，希望呢班人早日得到報應
無論黃色經濟圈idea幾好，無論有幾出名嘅KOL或Youtuber支持都好
現實問題係，一涉及利益同金錢，就會將成件事複雜化起嚟
亦成為立心不良嘅人利用嚟謀利嘅一個手法
希望大家付出金錢前，好好判斷清楚你究竟比緊錢比咩人
認真思考對方出發點係咩，認真諗下係咪得呢種方式去支持
就算你追隨咗好耐嘅人
都好容易因為利益而埋沒咗自己良心同初心
總之，好好思考同判斷一下
天氣凍了
希望各手足著多啲衫
出去記住包哂成個人
健康 安全
踏著灰色的軌跡 儘是深淵的水影
我已背上一身苦困後悔與唏噓
你眼裡卻此刻充滿淚～～～
Search